धनगढी। सुदुरपश्चिम विश्वविद्यालय अन्तर्गत कैलाली वहुमुखी क्याम्पसको सुत्रपात (प्रारम्भिक थालनी) मा पहिलो पटक वृहत राष्ट्रिय सम्मेलन आयोजना हुने भएको छ ।
अध्ययन अध्यापनको परम्परागत ढङ्गलाई परिमार्जन गर्दै पत्रिका (जर्नल) प्रकाशनको माध्यमबाट ज्ञानको प्रवद्र्धन गर्ने उदेश्यले कैलाली वहुमुखी क्याम्पस अन्तर्गतको “अनुसन्धान तथा व्यवस्थापन सेल” ले यही चैत्र १८ र १९ गते (शनिबार र आईतबार) उक्त वृहत राष्ट्रिय कार्यपत्र कार्यशाला सम्मेलन आयोजना गर्दै छ ।
प्राज्ञिक व्यक्तित्वहरुले समाजमा रहेको स्थिर संस्कृतिलाई अनुसन्धानका माध्यमबाट बाहिर ल्याउने तथा समाजमा विद्यमान संस्कृति र प्रचलनलाई प्रवद्र्धन गरि ज्ञानको रुपमा विकास गर्ने उक्त सेलका संयोजक एवं सह–प्राध्यपक मोहन सिंह साउँदले वताउनुभयो ।
उहाँका अनुसार सुदुरपश्चिम विश्वविद्यालय अन्तर्गत कैलाली वहुमुखी क्याम्पसको आयोजनामा हुने उक्त कार्यक्रममा नेपालका त्रिभुवन विश्वविद्यालय, सुदुरपश्चिम विश्वविद्यालय, मध्यपश्चिम विश्वविद्यालय, गण्डकी विश्वविद्यालय, काठमाण्डौँ विश्वविद्यालय, नेपाल संस्कृत विश्वविद्यालय, र भारतको लखनउ विश्वविद्यालयका प्राज्ञिक व्यक्तिहरुले विभिन्न विषयमा कार्यपत्र प्रस्तुत गर्ने छन ।
जसमा कैलाली वहुमुखी क्याम्पसका १० जना प्राध्यापक, भारतको लखनउ विश्वविद्यालयका २ जना र नेपालका अन्य विश्वविद्यालयका ५० गरी ६२ जना प्राध्यापकहरु रहने जनाईएको छ ।
विहीबार आयोजित पत्रकार सम्मेलनमा वोल्दै संयोजक साउँदले “अनुसन्धान तथा व्यवस्थापन सेल”ले अनुसन्धानात्मक लेखहरु समेटेर वार्षिक रुपमा “केएमसी जर्नल” पत्रिका प्रकाश गर्ने गरेको वताउनुभयो ।
यस्तै कैलाली वहुमुखी क्याम्पसका सह–प्राध्यापक डा.राजेन्द्रवीर चन्दले अनुसन्धान गरेका विषयवस्तुलाई बाहिर ल्याउने प्रयासको थालनी र निरन्तरता तथा त्यसलाई आलोचनात्मक समिक्षा सहित भोलीका लागि मार्गदर्शन हुने र समाजमा त्यसको उपादेयता सिद्ध गर्न सक्नुपर्ने वताउनुभयो।
यस्तै क्याम्पसका आम सञ्चार र पत्रकारिता विभागका उप–प्राध्यापक भुवन भण्डारीले सम्वन्धित क्षेत्रका विज्ञहरुले कार्यपत्र प्रस्तुत गर्ने र त्यसमा उल्लिखित तथ्य तथ्याङ्कले समाजलाई सहयोग पुग्ने वताउनुभयो। यसले अनुसन्धानको दायरालाई फराकिलो बनाउनुका साथै विश्वविद्यालय र विद्यार्थीहरुमा नयाँ ज्ञानको निर्माण हुने उहाँको भनाई छ ।
उक्त गोष्ठी कैलाली वहुमुखी क्याम्पसमा दुबै दिन विहान ७ बजे देखि वेलुका ५ बजेसम्म हुनेछ। कार्यक्रममा मध्यपश्चिम विश्वविद्यालयका उप–कूलपति प्राध्यपक डा.नन्द बहादुर सिंह प्रमुख अतिथि रहने जनाईएको छ ।
