धनगढी । सुदुरपश्चिम विश्वविद्यालयको उपकुलपतिमा प्रा.डा. हेमराज पन्त नियुक्त हुनुभएको छ । बिहीबार बसेको मन्त्रीपरिषद् बैठकले डा. पन्तलाई सुदुरपश्चिम विश्वविद्यालयको उपकुलपति नियुक्त गर्ने निर्णय गरेको हो ।
बुधबारमात्रै उपकुलपति छनोट तथा सिफारिस समितिले पन्तसँगै प्रा.डा. अक्कल देव मिश्र र प्रा.डा. भावनीदत्त जोशीको नाम सिफारिस गरिएको हो । तिनजना मध्येबाट पन्तलाई कुलपति तथा प्रधानमन्त्री पुष्पकमल दहालले नियुक्त गर्नुभएको हो ।
यसअघिका उपकुलपति डा.अम्मरराज जोशीको फागुन १८ मा कार्यकाल समाप्त भएदेखि विश्वविद्यालय निमित्त उपकुलपतिका रुपमा कर्ण बहादुर थापाले कार्यसम्पादन गर्दैआउनुभएको छ ।
विश्वविद्यालय अनुदान आयोगका अध्यक्ष डा.देवराज अधिकारीको अध्यक्षतामा उपकुलपति छनोट तथा सिफारिस समिति गठन भएको थियो । समितिले दरखास्त आह्वान गर्दा १० जनाको आवेदन परेको थियो । सोचपत्र र कार्ययोजनाको मूल्यांकनपछि अन्तर्वार्ता लिएर ३ जना सिफारिसमा परेका हुन् ।