धनगढी । धनगढीमा आगलागी हुँदा दुईओटा कुखुरा फार्म जलेर नष्ट भएका छन् ।
धनगढी उप–महानगरपालिका वडा नं. १२ स्थित जुगेडा ‘डी’ गाउँका स्थानीय किसान गगन खत्रीको कुुखुरा फार्ममा आगलागी भएको हो ।
स्थानीय आयुष्मा पन्तले दिनुभएको जानकारी अनुसार बेलुकी ४ बजेतिर आगलागी भएको र प्रहरी, स्थानीय तथा नगरपालिकाको दमकलको सहायताले आगो नियन्त्रणमा आएको छ ।
सम्बन्धित किसान गगन खत्रीले १२ सय र २ हजार कुखुरा अट्ने क्षमताका दुईवटा कुखुरा फार्ममा आगो लागेको जानकारी दिनुभयो ।
“कुखुरा आज आउनेवाला थियो तर आईनपुगेकाले बचिहाल्यो, तर भित्र राखेका पम्पहरु, फ्यानहरु, औषधी, भाँडाकुँडा लगायत सबै सामानहरु जलेर नष्ट भयो, केहि पनि रहेन” उहाँले भन्नुभयो ।
७ लाख लगानीको काठको खोर र ४ लाख लगानीको ट्रसले निर्माण गरेको खोर तथा भित्र राखेका सामान सहित अनुमानित २ लाख गरि झण्डै १३ लाख बराबरको क्षति भएको उहाँले बताउनु भएको छ ।
आगलागीको कारण थाहा नभएको र प्रहरीले मुचुल्का तयार पारिरहेको उहाँले जानकारी दिनुभयो ।
तस्बीर स्रोतः आयुष्मा पन्त
